قالت النائبة ألفت المزلاوي عضو مجلس النواب عبر صفحتها الرسمية على فيسبوك إن هذا الصيف الحار يحتاج إلى خروجة، القعدة في البيت تزيد من الشقاق الأسري ، مطالب كل بيت لا تنتهي وهي كثيرة ومع ضيق الحل يصبح الحل في الخروج للتنزه والتقاط الأنفاس لتدبير الأمر، اللي معاه فلوس وعربية يروح نوادي وكافيهات ودا محظوظ لأن معاه وقادر.. الكلام علي من لا يملك ومن لا يستطيع!
طيب اللي ممعاهوش الدولة وهي المهتمه ببناء الإنسان هتساعده إزاي؟ ، هناك من يوفر متنزهات مجانيه أو بتكلفة محدودة وهناك من يفتح مراكز شباب وأندية طلائع مجانية وشواطئ مجانيه في محافظات الساحل، وهناك من يطرح برامج صيفية لرعاية المجتمع محدوي الدخل وأولادهم؛ شوية حفلات علي ألعاب علي تسلية وترفيه وتوعية، فالصيف يعدي حلو وكله بتراضي .. هناك من يبدع لإدخال السعادة علي مواطنيه وهذه النماذج تمثلها عدد من المحافظات في وجه بحري وفي الصعيد هتلاقي ده في المنيا وأسيوط وقنا وطبعًا الأقصر وأسوان.
موضحة أن هناك نماذج أخري تتجاهل ذلك كله عندما تقرر جعل كافة مرافقها الترفيهية بتذاكر دخول “مصدر دخل يعني”، فتؤجر بكل قسوة ممتلكات الشعب وهذا النموذج تمثله بوضوح “سوهاج” التي لا ينجو مركز واحد من مراكزها من القسوة في إهدار حقوق الغلابة لالتقاط أنفاسهم، هيقولك التذاكر بتضمن الحفاظ علي الحدائق هقوله اللي يضمن أكتر أفراد أمن مدني مؤدبين لكل حديقة ومتنزه مش تذاكر وتضييق علي الناس.
حديقة الشعب اللي في “ميدان ثقافة سوهاج” بعد ما كلنا صقفنا وشجعنا وشكرنا وهللنا للكبير والصغير علي تطويرها وافتتاحها، قالولي ساعتها المسئولين أنها مجانية وستظل – زي الفيس بوك كده- ، دلوقتي بقت بتذاكر وقفلوا الباب علي الأسرة الفقيرة التي لا تستطيع توفير تذاكر للدخول ومنهم للشارع ناهيك عن المراجيح والالعاب والغليان مش قادر يدفع !
كل ميادين سوهاج بقت محتلة كافيهات وقهاوي لا عارف تعدي بعربية ولا تعدي علي رجلك؛ ولو جيت تركن هتلاقي اللي يدفعك بالساعة.. شوف كده ميدان الشبان بقي عامل ازاي وازاي القهاوي سيطرت عليه وقفلته.. يا خسارة اللي ادفع فيه وفي تطويره.
حديقة الاستاد بفلوس، حديقة اللوتس بفلوس ، حديقة المحافظة جنب المتحف مؤجرة وفنجان القهوة فيها 20 و25 جنيه حسب نوع”البن” ، كافيهات ، النوادي وأروقتها مؤجرة والوقفه فيها بفلوس، المسرح الروماني متأجر، الكورنيش بقي متقسم مناطق وتروح تقعد تلاقي اللي هيدفعك تحت أي مسمي وهتدفع يعني هتدفع؛ والأقسي من كل ذلك أنه لا توجد مراحيض عامة في سوهاج واللي يتزنق يتصرف😌
نرجع تاني الناس الغلبانه اللي ممعهاش فلوس تعمل ايه، الناس دي حست بكل الأحاسيس اللي تخوف، حست بالسخط والتفاوت وكسرة النفس، والدونية ، تفتكر الاحاسيس دي بتعمل إيه في اصحابها؟! ايوه بالظبط كده.. وبعدها نصرخ من الجرائم والبلطجة والإدمان والسرقات.
بعدما تم تأجير كل ممتلكات الشعب (حدائق عامة – ميادين- طرق وكباري.. كورنيش وشوارع .. فلوس الايجارات دي كلها بتروح فين وبتخصص لإيه؟! طيب نصيب الأسرة الفقيرة من الفلوس دي كام وبترجعلهم في شكل إيه.. إذا كانت بترجعلهم أصلًا!
الأمر محتاج مراجعة وممتلكات الشعب نتركها للشعب مع رقابة لطيفة هادئة من الدولة لحماية الممتلكات وصيانتها مش أكتر.
ــــــــــــــــ
د. ألفت المزلاوي – عضو مجلس النواب